16 апрел Шумораи Чоруми маҷаллаи бонуфузи ҷумҳурии Халқии Хитой «Контимост» мусоҳибаи хабарнигори худро бо Президенти Ҷумҳурии Тоҷикистон Эмомалӣ Раҳмон таҳти унвони «Шоҳроҳи бузурги абрешим — пайвандгари гузашта, имрӯза ва оянда…(Великий шелковый путь — мост между прошлым, настоящим и будущем…) ба чоп расонидааст.
Дар мусоҳиба Сарвари давлати Тоҷикистон доир ба пешрафту дастовардҳои истиқлолияти давлатӣ дар бахшҳои сиёсию иқтисодӣ ва фарҳангӣ, татбиқи муваффақонаи барномаҳои дарозмӯҳлати фарогири муҳимтарин соҳаҳои ҳаёти ҷомеа, ҷалби сармояи хориҷӣ, бунёди корхонаҳои азими муштараки истеҳсолӣ, раванди демократикунонии ҷомеаи навини тоҷикон робита бо мамолики сулҳпарвари олам ва дурнамои сиёсати дохиливу хориҷии Ҷумҳурии Тоҷикистон изҳори назар намудааст.
Аксари маводи шумораи нави маҷалларо мақолаву расмҳои таҷассумгари расму оинҳои мардумӣ ва пешравиҳои иқтисодию илмии даҳсолаи охири Тоҷикистон дар бар гирифтаанд.
Дар мақола ҳамзамон дар мавзӯоти ҳамкориҳои дуҷонибаю бисёрҷонибаи Ҷумҳурии Тоҷикистон бо Ҷумҳурии мардумии Хитой дар доираи созмони ҳамкориҳои Шанхай, инчунин дигар масъалаҳои вобаста ба амнияту пешрафти минтақа ва ҷаҳон дахл карда шудааст. Рӯзномаҳои марказии Ҷумҳурии Мардумии Хитой низ доир ба авзои кунунии Ҷумҳурии Тоҷикистон навиштаҳои ҷолибро пешкаши миллионҳо хонандагон гардонидаанд.
Мавриди зикр аст, ки маҷаллаи сертиражи «Контимост» бо забонҳои гуногуни дунё нашр гардида, дар бештар аз 100 мамлакати сайёра паҳн карда мешавад.