20 март Президенти Ҷумҳурии Тоҷикистон Эмомалӣ Раҳмон бо аҳли зиё мулоқот кард. Мулоқоти навбатии анъанавии Сарвари давлат бо зиёиён дар театри академӣ-драмавии ба номи устод Абулқосим Лоҳутӣ баргузор гардид, ки ин махзани ҳунар аз ҳисоби маблағҳои хазинаи эҳтиётии Президенти Ҷумҳурии Тоҷикистон комилан тармиму таҷдид ёфт.
Дар вохӯрӣ Сарвари давлат аҳли илму фарҳангро хазинаи беназири ақлонии миллат арзёбӣ карда, изҳор дошт, ки баҳри беҳдошти ҳаёту фаъолияти онҳо тамоми имкониятҳоро сафарбар менамояд.
Роҳбарият ва масъулини вазорату идораҳои дахлдор, ки дар мулоқот иштирок доштанд, ҷиҳати то вохӯрии соли 2005 таъмиру таҷдиди бинои Институти гастроэнтрология ва пурра мавриди истифода қарор додани як хобгоҳ барои аспирантони макотиби олӣ дар шаҳри Душанбе вазифадор гардиданд.