8 декабр мулоқоти судбахши Президенти Ҷумҳурии Тоҷикистон Эмомалӣ Раҳмон бо Дабири Кулли Созмони Конфронси Исломӣ профессор Акмалиддин Эҳсонуғлу баргузор гардид.
Дар вохӯрӣ масоили зиёди вобаста ба ҳамкории кишварҳои мусулмонӣ ба хотири рушди устувор, дур гаштан аз ақидаҳои аз пешрафт боздоранда ва дар маҷмӯъ баланд бардоштани нақш ва мақоми Созмони Конфронси Исломӣ дар арсаи байналмилалӣ мубодилаи судманди афкор сурат гирифт.
Ҳамчунин масъалаи кушодани намояндагии доимии давлати Тоҷикистон дар назди Созмони Конфронси Исломӣ баррасӣ гашт.
Зимни мусоҳиба бо хабарнигорон Дабири Кулли Созмон Акмалиддин Эҳсонуғлу натиҷаҳои мулоқот ва аҳамияти нутқи Президенти Ҷумҳурии Тоҷикистон Эмомалӣ Раҳмонро баланд арзёбӣ намуда, изҳори боварӣ кард, ки аксари пешниҳодҳои Сарвари давлати Тоҷикистон дар санадҳои хотимавии иҷлосия барои татбиқи амалӣ инъикос хоҳанд ёфт.