Президенти Ҷумҳурии Тоҷикистон Эмомалӣ Раҳмонов иштирокчиёни ҷаласаи 22-юмин Шӯрои байниҳукуматии кишварҳои аъзои Иттиҳоди Давлатҳои Мустақил оид ба ҳамкорӣ дар соҳаи сохтмонро ба ҳузур пазируфт.

Сарвари давлат бо сухани муқаддимавӣ баромад намуда, иштирокчиёни ҷаласаи навбатии Шӯроро ба хоки Точикистон хайрамақдам гуфт ва афзуд, ки ҳамкории кишварҳои ИДМ дар соҳаи сохтмон яке аз омилҳои асосии муттаҳидкунанда аст. Маҳз ҳамин соҳа имкониятҳои зиёди ҳамкорӣ дорад, аз ҷумла ба он хотир, ки идораҳои сохтмонии кишварҳои мо пеш ҷузъҳои як системаи ягона буданд.

Президенти Ҷумҳурии Тоҷикистон Эмомалӣ Раҳмонов ҳамчунин таъкид дошт, ки дар қаламрави ИДМ бозори азими маҳсулот ва хизматрасониҳои сохтмонӣ мавҷуд аст, ки аз он мо ҳама сермаҳсул бояд истифода барем. Сохтмончиёни Тоҷикистон ба ҳамкорӣ бо сохторҳои сохтмонии кишварҳои иттиҳод сахт манфиатдоранд, чунки аз ҷаҳду талошҳои муштараки ҳамаи мо татбиқи амалии нақшаҳои бузурги ояндаи мову шумо вобастагии зич доранд.

Дар фароварди баромадаш Президенти Ҷумҳурии Тоҷикистон Эмомалӣ Раҳмонов изҳори умед кард, ки ҷаласаи навбатии Шӯро дар Тоҷикистон ба инкишофи минбаъдаи ҳамкориҳои судбахш дар соҳаи сохтмон мусоидат мекунад ва як қатор мушкилоти ҳалталаби ин соҳа дар ин ҷо ҳаллу фасл мегардад.

Вазири рушди минтақавии Федератсияи Россия Владимир Яковлев ба Президенти Ҷумҳурии Тоҷикистон Эмомалӣ Раҳмонов барои таваҷҷӯҳи бевоситааш ба кори ҷаласаи Шӯро изҳори миннатдорӣ намуда, таъкид дошт, ки саҳми Сарвари давлати Тоҷикистон Эмомалӣ Раҳмонов дар ҷараёни равандҳои муттаҳидсозии имкониятҳои муштараки судбахш дар доираи созмонҳои байналмилалию минтақавӣ бисёр назаррас ва боиси пуштибонист.