19 октябр Президенти Ҷумҳурии Тоҷикистон Эмомалӣ Раҳмон Раиси Шӯрои уламо - Раиси Маркази исломии Ҷумҳурии Тоҷикистон Ҳоҷӣ Амонулло Неъматзодаро ба ҳузур пазируфт.

Дар сӯҳбат атрофи масоили вобаста ба танзими урфу одат ва маросимҳои динӣ дар ҷумҳурӣ, ҷараёни моҳи шарифи Рамазон, омодагӣ ба иди саиди Фитр мубодилаи афкор сурат гирифт.

Раиси Шӯрои уламо - Раиси Маркази исломии Ҷумҳурии Тоҷикистон Ҳоҷӣ Амонулло Неъматзода дар оғози сӯҳбат ба Президенти Ҷумҳурии Тоҷикистон Эмомалӣ Раҳмон арзи сипосу миннатдорӣ ва хушнудии мусулмонони ҷумҳуриро барои дар сатҳи олӣ баргузор кардани рӯзҳои фарҳанги бостонию оламшумули Тоҷикистон дар Федератсияи Россия ва Рӯзи Тоҷикистон дар ЮНЕСКО расонда, нақши Сарвари давлати Тоҷикистонро дар пуштибонӣ аз дини мубини Ислом ва манфиатҳои мусулмонони ҷаҳон аз минбарҳои баланди бонуфузтарин созмонҳои байналмилалӣ - Созмони Милали Муттаҳид ва ЮНЕСКО муҳимму саривақтӣ ва бисёр муассир арзёбӣ намуд.

Президенти Ҷумҳурии Тоҷикистон Эмомалӣ Раҳмон дар ин маврид таъкид дошт, ки баҳри пешгирӣ ва танзими дурусти ин корҳо чораҳои зарурӣ бояд андешида шаванд.

Дар мулоқот таъкид карда шуд, ки аз харҷу масрафҳои зиёд дар гузаронидани маъракаҳо дида, расондани кӯмак ба оилаҳои камбизоат, хонаҳои ятимону бепарасторон ва маъюбон савоби бештаре дорад.

Дар мулоқот ҳамчунин атрофи масоили гуногуни вобаста ба дини Ислом ва маросими динӣ дар ҷумҳурӣ табодули назар карда шуд.