Қабл аз оғози барномаи ҳунарии устодони санъати Тоҷикистон ва ҷавонони соҳибистеъдод дар доираи Рӯзи фарҳанги Тоҷикистон дар ЮНЕСКО, ки дар толори марказии ин созмони бонуфуз баргузор шуд, Президенти Ҷумҳурии Тоҷикистон Эмомалӣ Раҳмон ва Дабири Кулли ЮНЕСКО Коичиро Матсуура суханронӣ намуданд.

Аз ҷумла Сарвари давлати Тоҷикистон ин тадбири муҳимми фарҳангиро ибтидои марҳилаи нави ҳамкориҳои Ҷумҳурии Тоҷикистон бо ЮНЕСКО арзёбӣ кард.

Коичиро Матсуура барои саҳми босазо дар инкишофи муносиботи фарҳангӣ, ҳифзу гиромидошти ёдгориҳои таърихӣ ва мавқеи дурбинонаи фарҳангпарварӣ ба Президенти Ҷумҳурии Тоҷикистон Эмомалӣ Раҳмон медали тиллои ЮНЕСКО - ро тақдим кард.

Барномаи ҳунарӣ аз ҷониби намояндагони 196 мамлакати дунё бо хушнудии комил пазируфта шуд.

Дар толори бинои театри бузурги операи шаҳри Париж, ки аз қадимтарин театрҳои Аврупо мебошад, барномаи дигари консертии ҳунармандони тоҷик баргузор шуд.