3 сентябр дар арафаи таҷлили 14-умин солгарди Истиқлолияти кишвар дар ҳаёти сиёсиву фарҳангии кишвар боз як рӯйдоди муҳимму фараҳбахш ба вуқӯъ пайваст. Дар пойтахти ҷумҳурӣ муассисаи давлатии телевизиони "Сафина" ба фаъолият шурӯъ кард. Оғози пахши барномаҳои шабакаи сартосарии телевизиони "Сафина" ифодагари дастовардҳои нави фарҳангу иттилоот дар Ҷумҳурии тозаистиқлоли Тоҷикистон, амалисозии умеду ормонҳои деринаи фарҳангиёни сарзамин аст.

Дар маросими ифтитоҳи ин шабакаи телевизионӣ Президенти Ҷумҳурии Тоҷикистон Эмомалӣ Раҳмон, муовини Сарвазири ҷумҳурӣ Хайриниссо Мавлонова, аъзои Ҳукумат, намояндагони Дастгоҳи иҷроияи Президенти ҷумҳурӣ, аҳли зиё ва хабарнигорони ватанию хориҷӣ иштирок намуданд.

Сардори давлат ҷамъомадагон ва мардуми мамлакатро бо ин воқеаи фараҳбахш табрик намуда, ҳамчунин ифтитоҳи ин муассисаи телевизиониро падидаи нек номид.