8 август Президенти Ҷумҳурии Тоҷикистон Эмомалӣ Раҳмон бо нахустин сафари расмӣ ба Шоҳигарии Таиланд омад. Дар фурудгоҳи байналмилалии шаҳри Бангкок Президенти Ҷумҳурии Тоҷикистон Эмомалӣ Раҳмонро вазири энергетикаи Шоҳигарии Таиланд Висен Чупибен ва дигар шахсони расмӣ истиқбол гирифтанд.
9 август Президенти Ҷумҳурии Тоҷикистон Эмомалӣ Раҳмон дар доираи барномаи нахустин сафари расмии худ ба Шоҳигарии Таиланд бо дастовардҳои илмиву саноатӣ ва кишоварзии ин мамлакати пешрафта шинос гардид.
Дар маркази кишоварзию саноатии мутааллиқи Шоҳи Таиланд таҷрибаи нодир аз зироатҳои кишоварзӣ тавлид кардани маҳсулоти ниҳоӣ бо усули коркарди партовҳо, истифодаи мақсадноки ҳар як қисмати маҳсулот ва риояи талаби сифату миқдор мушоҳида мегардад, ки ба роҳ мондани он аз фоида холӣ нест. Президенти Ҷумҳурии Тоҷикистон Эмомалӣ Раҳмон диққати соҳибкорони ватаниро, ки дар ин сафар Сарвари давлатро ҳамроҳӣ менамуданд, ҷиҳати истифодаи таҷрибаи пешқадами деҳқонону саноатчиёни Шоҳигарии Таиланд ҷалб кард.