30 май Президенти Ҷумҳурии Тоҷикистон Эмомалӣ Раҳмон бо мудири минтақавии бюрои Барномаи рушди СММ дар мамлакатҳои Аврупои Шарқӣ ва ИДМ Калман Мижей мулоқот кард.
Эмомалӣ Раҳмон ба Калман Мижей барои саҳми калони Барномаи рушди СММ дар ташкил ва гузаронидани Конфронси байналмилалии ҳамкории минтақавӣ дар ҳавзаҳои дарёҳои сарҳадгузар миннатдорӣ баён карда, изҳори боварӣ намуд, ки ин тадбири муҳим барои амалӣ сохтани ҳадафу ғояҳои Даҳсолаи байналмилалии амалиёти "Об барои ҳаёт" нақши калон хоҳад бозид.
Баъдан вазъияти имрӯза ва нақшаи ояндаи ҳамкории Тоҷикистон ва Барномаи рушди СММ муҳокима карда шуд.
"Тоҷикистон,- гуфт Эмомалӣ Раҳмон, - ба сатҳи ҳамкории худ бо Барномаи рушди СММ ҳамчун ҳамоҳангсози ҷидду ҷаҳдҳои доманадори Созмон дар мамлакат баҳои баланд медиҳад. Агар дар давраи аввали ҳамкорӣ қонеъ гардондани талаботи Тоҷикистон бо кӯмакҳои хайрия аҳамияти зиёд дошта бошад, пас имрӯз ба иҷрои барномаҳои иҷтимоию иқтисодӣ ва нақшаҳое диққати бештар дода мешавад, ки ҳадафи онҳо таъмини рушди босуботу дарозмӯҳлат мебошад
Мусоҳибон сипас аҳамияти чунин барномаҳо, аз ҷумла барномаҳои "Рушди ҷамъиятҳо", "Идораи сарҳад", расонидани кӯмак ба иҷрои барномаи безарар гардонидани минаҳо ва шабакаҳои миллии иттилоотӣ дар масъалаи хариду фурӯши маводи нашъаовар, афзун гардондани нерӯи маркази таҳқиқоти ҷиноят ва танзими омодасозии кадрҳои ВКД-ро таъкид намуданд.
Президенти Ҷумҳурии Тоҷикистон Эмомалӣ Раҳмон оид ба масъалаҳои густариш додани ҳамкорӣ дахл намуда, ба ҳамкорӣ дар чунин самтҳои афзалиятнок, аз ҷумла ҷалби сармоя, амалӣ сохтани нақшаҳо ва барномаҳои паст кардани сатҳи камбизоатӣ, ташкили ҷойҳои нави кор, сармоягузории хурд ва афзун гардондани имкониятҳои иқтисодии маҳалҳо, дастгирии кӯшишҳои Тоҷикистон барои қабули он ба узвияти Созмони ҷаҳонии тиҷорат, муосидат ба амалӣ сохтани барномаҳои дорои аҳамияти минтақавӣ дар соҳаҳои энергетика, нақлиёт, алоқа, экология, маориф ва тандурустӣ мароқ зоҳир намуд.