24 май Президенти Ҷумҳурии Тоҷикистон Эмомалӣ Раҳмон бо Сарвазири шоҳигарии Таиланд Тхаксин Чиннават мулоқоти тӯлонию пурмӯҳтаво анҷом дод.
Дар сӯҳбат масъалаҳои вобаста ба сафари нахустини расмии қарибулвуқӯъи Президенти Ҷумҳурии Тоҷикистон Эмомалӣ Раҳмон ба шоҳигарии Таиланд баррасӣ шуданд.
Ҷонибҳо масъулини ҳукуматҳоро вазифадор намуданд, ки барои таҳкими заминаҳои қарордодию ҳуқуқии ҳамкориҳои дуҷониба тамоми имкониятҳои мавҷудаи муносиботи иқтисодию тиҷоратӣ ва илмию техникиро мавриди омӯзишу таҳлили амиқ қарор дода, лоиҳаи санадҳои ҳуқуқиро то оғози сафари расмии Сарвари давлати Тоҷикистон ба Таиланд омода созанд.
Шоҳигарии Таиланд дар Осиёи Ҷанубӣ-Шарқӣ мавқеият дошта, бо мамолики Бирма, Лаос, Камбоҷа ва Малайзия ҳамсарҳад аст. Пойтахташ шаҳри Бангкок. Аҳолии Таиланд 58 миллиону 256 ҳазорро ташкил медиҳад. Забони расмӣ тайӣ буда, ҳамзамон забонҳои хитойӣ, англисӣ ва малайзӣ истифода мешаванд.
Мавриди зикр аст, ки Таиланд аз кишварҳои соҳибтаҷрибаи мубориза алайҳи гардиши ғайриқонунии маводи мухаддир мебошад. Мувофиқи талаботи қонунгузории ин кишвар нашъаҷаллобон ба қатл маҳкум карда мешаванд.