19 январ Президенти Ҷумҳурии Тоҷикистон Эмомалӣ Раҳмон аз Сафири  Фавқулодда ва Мухтори Юнон дар Ҷумҳурии Тоҷикистон Димитрос Параскевопулос эътимоднома қабул кард.

Баъди маросими қабули эътимоднома дар ҷараёни сӯҳбат маҷмӯи масъалаҳои  марбут ба ҳамкории Тоҷикистону Юнон муҳокима шуданд.

- Мамлакатҳои мо барои ҳамкорӣ захираю имкониятҳои калон доранд. Ин ба онҳо барои боз ҳам бештар ривоҷ додани  муносибатҳои  мутақобилан муфиди  тиҷоратию иқтисодӣ шароити  мусоид муҳайё месозад, - гуфт Эмомалӣ Раҳмон.

Маблағи хариду фурӯши мол дар байни Ҷумҳурии Тоҷикистон ва Юнон дар давоми 11 моҳи соли  гузашта бештар аз 6 миллион доллари ИМА-ро ташкил дод, ки нисбат ба солҳои гузашта хеле зиёд мебошад. Мусоҳибон густариш додани чунин тамоюли мусбатро тарафдорӣ намуданд.

Эмомалӣ Раҳмон зикр кард, ки захираи фаровони сарватҳои табиии Тоҷикистон ва иқтидорҳои истеҳсолии мавҷудаи он, ки мутаассифона, мавриди баҳрабардорӣ қарор нагирифтаанд, бо истифодаи имкониятҳои бузурги  илмию техникии Юнон барои ҳамкории мутақобилан муфиди ҳар ду кишвар заминаи мусоид гузошта метавонад.

Сафири нави Юнон баъди мулоқоташ бо Эмомалӣ Раҳмон дар ҷараёни сӯҳбат бо хабарнигорон зикр кард, ки Юнон ҳамчун узви Иттиҳоди Аврупо муносибатҳои дуҷонибаро  бо Тоҷикистон густариш дода, ба равнақу ривоҷи ҳамкории он бо Иттиҳоди Аврупо, СММ ва тамоми мамлакатҳои ҷаҳон мусоидат мекунад.

- Мо бо Президент Эмомалӣ Раҳмон масъалаи омода сохтани силсилаи ҳуҷҷатҳоро баррасӣ кардем, ки дар оянда имзо карда мешаванд. Умед аст, ки онҳо ба ободӣ ва пешрафти мамлакатҳоямон мусоидат хоҳанд кард, - гуфт сафир.