Рӯзи 18 январ Президенти Ҷумҳурии Тоҷикистон Эмомалӣ Раҳмон ҳамчунин аз Сафири нави Фавқулодда ва Мухтори Туркия дар Ҷумҳурии Тоҷикистон Ахмет Алтай Ченгизэр эътимоднома қабул кард.
Дар ҷараёни сӯҳбати пурмӯҳтавои тӯлонӣ, ки баъди маросими эътимодномасупорӣ баргузор шуд, Президенти Ҷумҳурии Тоҷикистон Эмомалӣ Раҳмон таъкид кард, ки Ҳукумати Ҷумҳурии Тоҷикистон тарафдори ҳарчи бештар нумӯъ ёфтани муносибатҳо бо Туркия - шарики дерина ва муҳимми худ мебошад.
Дар вохӯрӣ маҷмӯи васеи масъалаҳои вобаста ба ҳамкориҳои иқтисодию тиҷоратии Тоҷикистону Туркия, инчунин муҳимтарин масоили байналмилалӣ баррасӣ шуданд.
Тазаккур дода шуд, ки терроризм, экстремизм ва қочоқи маводи мухаддир хатарҳои асосии таҳдидкунанда ба амнияти минтақавию ҷаҳонӣ мебошанд. - "Мо ҷонибдори қатъии таҳкими эътилофи зиддитеррористӣ, мукаммалсозии механизмҳои фаъолияти он ва таъсиси шарикии глобалии зидди маводи мухаддир мебошем", - афзуд Эмомалӣ Раҳмон.
Бо ҷонибдорӣ аз ин андешаҳо сафири нави Туркия саҳми шахсии Президенти Ҷумҳурии Тоҷикистон Эмомалӣ Раҳмонро дар таҳкими амнияту суботи минтақа ва ҷаҳон муассиру омӯзанда арзёбӣ кард ва илова намуд, ки роҳбарияти воломақоми кишвараш низ ба мавқеи сулҳпарваронаи Ҳукумати Ҷумҳурии Тоҷикистон баҳои баланд медиҳад.
Сӯҳбат дар фазои самимию созанда ҷараён гирифт.